আন’ৰা

 ৰিমলী বৰকটকী

আন’ৰা।

বৰ্তমান সময়ত সমগ্ৰ বিশ্বজুৰি চৰ্চিত এটি নাম৷

আজিৰ লেখাৰ বিষয় এই ছবি ছবি আন’ৰা, যিয়ে ৯৭তম একাডেমী বঁটা প্ৰতিযোগিতাত শ্ৰেষ্ঠ ছবি, শ্ৰেষ্ঠ পৰিচালক, শ্ৰেষ্ঠ অভিনেত্ৰী, শ্ৰেষ্ঠ অৰিজিনেল চিত্ৰনাট্য আৰু শ্ৰেষ্ঠ সম্পাদনাৰ বঁটা লাভ কৰিবলৈ সক্ষম হৈছে৷ ইয়াৰ উপৰি ছবিখনে কাঁ চলচ্চিত্ৰ মহোৎসৱত Palme d’or বঁটাও লাভ কৰিবলৈ সক্ষম হৈছিল৷ আমেৰিকান এই ছবিখন প্ৰথমে কাঁ চলচ্চিত্ৰ মহোৎসৱতে প্ৰিমিয়াৰ কৰা হৈছিল ২১মে’, ২০২৪ ত৷ পৰৱৰ্তী সময়ত ২০২৪ ৰে অক্টোবৰ মাহৰ ২৪ তাৰিখে ছবিখন দৰ্শকৰ বাবে মুকলি কৰি দিয়া হয়৷ পাঁচোটিকৈ অস্কাৰৰে জিলিকাৰ লগতেই অন্যান্য বঁটা-বাহন তথা মনোনয়ন লাভ কৰিবলৈয়ো সক্ষম হৈছে আন’ৰাই৷ ছবিখন বৰ্তমান দৰ্শকৰ বাবে জি ফাইভত উপলব্ধ৷ আন’ৰাৰ পৰিচালনা কৰিছে টাঞ্জাৰিন, ৰে’ড ৰকেটৰ দৰে আদি বহুল চৰ্চিত ছবিৰ পৰিচালক শ্বন বেকাৰে৷ ছবিখনৰ কাহিনী আৰু চিত্ৰনাট্যও লিখিছে শ্বন বেকাৰেই৷

আমেৰিকা যুক্তৰাষ্ট্ৰৰ ব্ৰুকলিনৰ এটি ষ্ট্ৰীপ ক্লাবত কাম কৰা এক্স’টিক ডাঞ্চাৰ (ক্লাবলৈ অহাসকলৰ আগত তৰপ তৰপকৈ দেহৰ বস্ত্ৰ গুচাই, মনোৰঞ্জন প্ৰদান কৰা নৰ্তকী) এনিৰ কাহিনী আন’ৰা৷ ছবিৰ আৰম্ভণি হয় ষ্ট্ৰীপ ক্লাৱত এনিৰ গতানুগতিক নৈশচৰ্যাৰে৷ তাৰ মাজতেই ২৩ বছৰীয়া এনিয়ে লগ পায় এজন ২১ বছৰীয়া ৰাছিয়ান যুৱক ইভানক৷ ইভান, যিয়ে ভালদৰে ইংৰাজী ক’ব নোৱাৰে আৰু এনি যিয়ে ৰাছিয়ান বুজি পোৱাৰ লগতে, ভঙা ভঙাকৈ ক’বও পাৰে৷ দুয়ো দুয়োকে লগ পায় আৰু এই লগপোৱাই এনিৰ জীৱনলৈ এক বিৰাট পৰিৱৰ্তন আনিবলৈ ধৰে৷ দুয়ো ক্লাৱৰ বাহিৰত, ইভানৰ আমেৰিকাৰ ঘৰত পাছদিনা লগ হয়৷ দুয়োৰে মাজত কায়িক নৈকট্য বাঢ়ে৷ আৰু বাঢ়ি বাঢ়ি এনে এক পৰ্যায় পায়গৈ যে ইভানে এনিক এসপ্তাহৰ বাবে তাৰ প্ৰেয়সী হৈ থাকিবৰ বাবে অনুৰোধ কৰে৷ অৰ্থৰ বিনিময়ত মান্তি হোৱা এনিয়ে অৱশেষত ইভানৰ এক অভাৱনীয় প্ৰস্তাৱৰ সন্মুখীন হয়৷ ইভানে এনিক বিৱাহৰ প্ৰস্তাৱ দিয়ে৷ হতভম্ব এনিয়ে অৱশেষত ইভানৰ প্ৰস্তাৱত মান্তি হয় আৰু দুয়ো লছ এঞ্জেলছত বিৱাহপাশত আৱদ্ধ হয়৷ ইভানৰ বিৱাহৰ খবৰ ৰাছিয়ান ক’লা ব্যৱসায়ী ইভানৰ পিতৃৰ কাণত পৰাৰ লগে লগে হাহাকাৰ লাগে৷ কাহিনীয়ে গতি সলায়৷ ইয়াৰ পৰৱৰ্তী পৰ্যায়ত ইভানৰ স্থিতি কি হয়, এনিয়ে কি কৰে, কিদৰে সিহঁত দুয়োৰে সম্পৰ্ক প্ৰচুৰ প্ৰতিকূলতাৰ মাজেৰে যায়, তাক লৈয়েই ছবিখন আগবাঢ়ে৷ বিশেষকৈ জটিল সময়খিনিত এই যেন এনিৰ ভাগি পৰাৰ ৰূপ এটা দেখিবলৈ পোৱা যাব এনে লাগি থাকে যদিও, পোৱা নেযায়৷ অন্তৰ্নিহিত সেই আৱেগৰ বহিঃপ্ৰকাশ ছবিৰ অন্তিম দৃশ্যত ঘটে৷ যিহেতু ষ্ট্ৰীপ ক্লাৱ, এক্স’টিক নৰ্তকীৰ কথা আছে গতিকেই স্বাভাৱিকতেই ছবিখনত ইন্দ্ৰিয় উদ্দীপক কিছু দৃশ্যাংশৰ উপস্থাপন কৰা হৈছে, কিন্তু এক সুষম মাত্ৰাত৷ আৰম্ভণিৰ হৈ-চৈ, আনন্দময় পৰিৱেশ মধ্যাংশৰ পৰা যতি পৰে আৰু শেষাংশলৈ ই এক বিষাদময় পৰিৱেশলৈ পৰিৱৰ্তিত হয়৷ আৰু ক্ৰমশঃ ছবিখনৰ মনোগ্ৰাহিতা বৃদ্ধি পায়৷ ছবিখনৰ কি দিশৰ প্ৰশংসা নকৰিম সিও এক বিষয়৷ ছবিখনৰ শক্তি হৈছে এখন সুষম গতিৰ চলচ্চিত্ৰৰ বাবে এখন গতিশীল আৰু সু-সংৰচিত চিত্ৰনাট্যৰ লগতে পৰিচালনা৷ ছবিখনৰ সম্পাদনাৰ দিশ, চিনেমেট’গ্ৰাফী, আৱহ সংগীত সকলো দিশেই প্ৰশংসনীয়৷ ছবিখনৰ সম্পাদনাও কৰিছে পৰিচালক শ্বন বেকাৰেই৷

এতিয়া আহিছোঁ অভিনয়ৰ দিশলৈ৷ প্ৰথমেই নাম ল’ব লাগিব ছবিখনৰ নাম ভূমিকাত অভিনয় কৰা এনি বা আন’ৰা অৰ্থাৎ মিকি মেডিচনৰ সাৱলীল অভিনয়ৰ কথা৷ সকলো পৰিস্থিতিতেই মিকি মেডিচন নিজৰ চৰিত্ৰটোত এনেদৰে একাত্ম হৈ আছিল যে সেই চৰিত্ৰটোত মেডিচনৰ বাদে আন কাৰো কথা ভবাৰ থলেই নাই৷ লগতে ইভানৰ চৰিত্ৰত অভিনয় কৰা মাৰ্ক ইডেলষ্টিনৰ অভিনয়ো শলাগনীয়৷ মুঠতে কোনো দিশৰে পৰাই আন’ৰা ছবিখন চাই নিৰাশ নহয় আপুনি৷

 ***

লেখিকাৰ ই-মেইল : rimli.borkotoky1985@gmail.com