ঘাঁহফুলৰ মাজেদি
এই সময়ৰ এক শক্তিশালী কবিকণ্ঠ কিশোৰ মনজিৎ বৰাৰ পঞ্চম কাব্যগ্ৰন্থ ‘ঘাঁহফুলৰ মাজেদি’ অলপতে প্ৰকাশ পাইছে৷ কবিগৰাকীৰ কাব্য পৰিক্ৰমা সন্দৰ্ভত স্বনামধন্য কবি-সমালোচক হৰেকৃষ্ণ ডেকাই কৈছে’- “একৈশ শতিকাৰ অসমীয়া কবিতাত কিশোৰ মনজিৎ বৰা এক শক্তিশালী কবিকণ্ঠ৷ তেওঁ অত্যাধুনিক সমাজ জীৱনৰ ওপৰত কৌতূহলী আৰু সমালোচনামূলক দৃষ্টি নিক্ষেপ কৰি আহিছে ৷ মানৱীয় সম্পৰ্ক আৰু পৰিৱেশৰ ওপৰত মানৱীয় ক্ৰিয়াৰ প্ৰতিক্ৰিয়া আদিৰ অনুভূতি চমকপ্ৰদ ভাষা আৰু প্ৰতীকী অনুষঙ্গৰে কিশোৰে উন্মোচন কৰিছে৷ তেওঁৰ কাব্য-ভাষাত এক নিজস্ব ঠাঁচ আছে৷”
গুৱাহাটীৰ অগ্ৰণী প্ৰকাশন গোষ্ঠী পূৰ্বাঞ্চল প্ৰকাশে আটকধুনীয়াকৈ প্ৰকাশ কৰা আলোচ্য
কাব্য সংকলনটিত ২০১৮ চনৰপৰা ২০২৫ চনলৈ কবিৰ দ্বাৰা ৰচিত ৪৫ টা কবিতাই ঠাই পাইছে৷ মুঠ
১০৪ পৃষ্ঠাৰ কাব্যগ্ৰন্থখনৰ মূল্য ২২০ টকা৷ গ্ৰন্থখনিৰ সৰহ সংখ্যক কবিতাই প্ৰান্তিক,
গৰীয়সী, সাতসৰী, প্ৰকাশ, অন্যযুগ, অসমীয়া প্ৰতিদিন, দৈনিক অসম, দৈনিক জনমভূমি আদি
কাকত-আলোচনীত ইতিমধ্যে প্ৰকাশ পাইছে৷ বিশিষ্ট সমালোচক অৰিন্দম বৰকটকীৰ মননশীল আগকথাসমৃদ্ধ কাব্যগ্ৰন্থখনত কবিৰ এটা আছুতীয়া
সাক্ষাৎকাৰো সন্নিৱিষ্ট হৈছে৷ প্ৰচ্ছদ অংকন কৰিছে সত্যজিৎ নাথে৷ বিশিষ্ট কবি, সমালোচক
হৰেকৃষ্ণ ডেকা আৰু ড০° আনন্দ বৰমুদৈয়ে
কিশোৰ মনজিতৰ কবিতা সন্দৰ্ভত প্ৰেৰণাদায়ক অভিমত আগবঢ়োৱা গ্ৰন্থখনিত ‘কলকাতা কবিতাগুচ্ছ’,
‘পেটিকোট ধোৱা মতা’, ‘পত্নী’, ‘ৰাতি পুৱাবনে...পুৱাব’, ‘কঁপে বাঁহপাত ম’ৰাপাখি’ আদি
ভালেকেইটা বহুচৰ্চিত কবিতা সন্নিৱিষ্ট
হৈছে৷ যশস্বী সমালোচক অৰিন্দম বৰকটকীৰ ভাষাৰে
- “এই গ্ৰন্থখনৰ
নাম ‘ঘাঁহফুলৰ মাজেদি’ হোৱা কথাটোত এনে এক প্ৰাকৃতিক নৈকট্য আছে যাৰ প্ৰতিফলন কবিৰ
প্ৰায়বোৰ কবিতাত লক্ষ্য কৰিব পাৰি৷ এই প্ৰাকৃতিকতা কেৱল গছ-বনৰ সামগ্ৰিকতা নহয়- ইয়াৰ
এক জৈৱিক মানৱীয় চৰিত্ৰ আছে যি ঘাঁহফুলৰ মাজৰ পৰা নাগৰিক বাস্তৱতালৈ পৰিভ্ৰমণ কৰি কবিৰ
সৰল কবিমনক প্ৰশ্নবোধক চাৱনিৰে জীৱন অভিজ্ঞতাৰ পৰ্যবেক্ষণ কৰিবলৈ সুযোগ দিছে৷ সেই অৰ্থত
‘কলকাতা কবিতাগুচ্ছ’ত গদ্যৰ পৃথিৱীক এইজন কবিয়ে কবিতাৰ ভাষাৰে ধৰি ৰাখিছে৷ নীলমণি ফুকনে
কৈ যোৱাৰ দৰে কিশোৰৰ কবিতাৰ পৰ্বান্তৰৰ বাবে এই নাগৰিক অভিজ্ঞতা জৰুৰী আছিল...৷’’ সাম্প্ৰতিক
সময় প্ৰবাহক মসৃণভাৱে প্ৰতিনিধিত্ব কৰা সংকলনটিয়ে সুধী সমাজৰ বিশেষ সমাদৰ পাব বুলি
আশা কৰা হৈছে৷
প্ৰকাশক : পূৰ্বাঞ্চল
প্ৰকাশ, গুৱাহাটী
পৃষ্ঠা সংখ্যা : ১০৪
মূল্য
: ২২০.০০ (দুশ টকা)মাত্ৰ৷
পঢ়ুৱৈৰ মতামত (০টা মন্তব্য)