আৱাহন

তেজৰ বেৰত টোকৰ পৰিল
কেঁচি-বটালিৰ অভিযান চলিল
ইমান সহজে শেষ হৈ নাযায়
        কাংক্ষিত স্পৃহাৰ জীৱন্ত টোপোলা৷

পানী লাগে পানী
পানীয়েই সকলোৰে আৰম্ভণি
কক্‌বক্ বুদ্‌বুদ্ বুদ্‌বুদ্
পানীয়েই মূল৷
        নাজানোহো আৱাহন, নাজানোহো বিসৰ্জন
পূজামন্ত্ৰ নাজানো কিঞ্চিৎ...

সকলোতে কেৱল বিজ্ঞান
        বন্ধ দুৱাৰত টুকুৰিয়াই উলটি আহে
আৱাহন৷
        প্ৰতিধ্বনি শুনি শুনি কাণ ঊনাই বহোঁতে
টুপুৰকৈ পৰিল এপাহি সৰগ ফুল৷

আকাশ এতিয়া ফৰকাল
এয়া আৱাহনৰ সময়৷