বিশাল

প্ৰয়াগ শইকীয়া

তুমি যদি অনুভৱ কৰি আছা বিষ

জীৱনে সলোৱা নাই এতিয়াও দিশ

তুমি যদি অনুভৱ কৰিছা আনৰ বিষ

বিশাল হোৱাৰ মহত্বৰে তুমি পাইছা

মানুহৰ আশীষ

বিষৰ পৰা বিষাল

বিষালক জিনি বিশাল

সীৰলুৰ শইচৰ আগেয়ে ধাৰাল নাঙলৰ ফাল

এই অনুভৱ থাকিলে

তুমি সহনশীল ধৰণীৰ সন্তান ভাল

বিষক পান কৰি নীললোহিত

নীললোহিত সৌন্দৰ্যৰ ঋত

সমুদ্ৰ মন্থনত দেৱ-দানবে বিচাৰিছিল অমৃত

কিন্তু নীললোহিতে বিচাৰিছিল জীৱনৰ হিত

বিষে নিদিয়ে কেৱল প্ৰস্থানৰ শীত

বিষে দিব পাৰে বিশাল হোৱাৰ গীত