(পাৰ্বতিপ্ৰসাদ বিষ্ণু ৰাভাৰ পৰা জাহ্নু-মঞ্জুলৈ)
নিজৰা ৰাজকুমাৰী
জোনালী নিশা তৰা লেখি লেখি
হ’লো মই আত্মহাৰা
হ’লো মই আত্মহাৰা
সেয়েহে মনৰ
মুক্ত নিজৰা
শান্তি সুষমা ধাৰা…
মধু মালতীৰ গন্ধ
মুক্ত বায়ু ছন্দ …
মালবিকা বৰাই এই গীতটি গাইছিল মই যোৱা সংখ্যাৰ 'অন্যযুগ'ত লিখিবলৈ আৰম্ভ কৰা অহিৰ ভৈৰৱ নামৰ চিনেমাখনৰ বাবে৷
'অহিৰ ভৈৰৱ' (২০০৭) চিনেমাখনৰ মূল বিষয়বস্তু হৈছে স্কিজ’ফ্ৰেনিয়া৷
কেনেকৈ স্কিজ’ফ্ৰেনিয়া বংশগতভাৱে এটা প্ৰজন্মৰপৰা আন এটা প্ৰজন্মলৈ যায়, আৰু সামাজিকভাৱে
গ্ৰহণযোগ্য নোহোৱাৰ ফলত ৰোগীয়ে জীয়াতু ভূগিবলগা হয় তাৰেই উপস্থাপন অহিৰ ভৈৰৱ৷ চিনেমাখনৰ
কাহিনী অনুসৰি ৰাভিক এজন প্ৰবাসী অসমীয়া আৰু ব্ৰিটেইনৰ বিশ্ববিদ্যালয়ৰ অধ্যাপক৷ তেওঁ
দিল্লী বিশ্ববিদ্যালয়ৰ ছেমিনাৰ এখনলৈ আহি জন্মভূমি অসমলৈও আহে৷ ইয়াতে ৰাভিকৰ মনীষাৰ
সৈতে চিনাকি হয়৷ দুয়ো দুয়োৰে প্ৰেমত পৰে আৰু পাছলৈ বিবাহ হয়৷ কিন্তু ৰাভিকে জনা নাছিল
যে মনীষা স্কিজ’ফ্ৰেনিয়া ৰোগী৷ এই কথা ৰাভিকক মনীষাৰ পৰিয়ালেও জনোৱা নাছিল৷ সময়ত মনীষা
গৰ্ভৱতী হ’ল৷ ৰাভিকে মনীষাৰ সকলো ধৰণৰ চিকিৎসাৰ ব্যৱস্থা কৰিছিল যদিও তেওঁলোকৰ সন্তান
নিকিতাও স্কিজ’ফ্ৰেনিয়াত আক্ৰান্ত হ’ল৷ অৱশ্যে প্ৰথম অৱস্থাতে খুব ভাল চিকিৎসাৰ ব্যৱস্থা
কৰাৰ ফলত নিকিতা যথেষ্ট আৰোগ্যও হল৷ এইখিনি সময়তে নিকিতাৰ ৰিউবেন নামৰ যুৱকজনৰ সৈতে
প্ৰেমৰ সম্পৰ্ক গঢ়ি উঠিল আৰু ৰিউবেনে নিকিতাক বিয়াৰ প্ৰস্তাৱ দিলে৷ নিকিতাৰ পিতৃয়ে
কিন্তু তেওঁৰ শহুৰেকৰ দৰে স্কিজ’ফ্ৰেনিয়াৰ কথা লুকুৱাই নাৰাখি ৰিউবেনক সকলো জনালে৷
এসময়ত ৰিউবেনে পাহাৰীয়া ঠাইত স্কিজ’ফ্ৰেনিয়া ৰোগীৰ বাবে ৰিহেবিলিটেশ্বন চেণ্টাৰ স্থাপন
কৰিলে আৰু তাত নিকিতাৰ সৈতে দুয়োৱে সেৱা আগবঢ়াবলৈ ধৰিলে৷ অহিৰ ভৈৰৱ শিক্ষামূলক চিনেমা
হিচাবে বৃটিছ ফিল্ম ইনষ্টিটিউটৰ মিউজিয়ামত সংৰক্ষিত হৈ আছে৷ ২০০৮ চনৰ নিউইয়ৰ্ক ইণ্ডেপেনডেণ্ট
ইণ্টাৰনেশ্বনেল ফিল্ম ফেষ্টিভেলত অহিৰ ভৈৰৱৰ বাবে শিৱপ্ৰসাদ ঠাকুৰে লাভ কৰিছিল শ্ৰেষ্ঠ
পৰিচালকৰ বঁটা৷ অহিৰ ভৈৰৱৰ বিভিন্ন চৰিত্ৰত অভিনয় কৰিছিল বিদ্যুৎ চক্ৰৱৰ্তী, পূৰৱী
শৰ্মা, মৃদুলা বৰুৱা, কপিল বৰা আৰু জেৰিফা ৱাহিদে৷ অতিথি শিল্পী হিচাপে অভিনয় কৰিছিল
শিৱপ্ৰসাদ ঠাকুৰ, অৱনী বৰা, ইলোৰা বৰুৱা, মাধুৰীমা চৌধুৰী, মুনমী চক্ৰৱৰ্তী, গীতা লহকৰ,
কিৰিপ চলিহা আদিয়ে৷ চিনেমাখনৰ দৃশ্যগ্ৰহণ বিদেশত কৰা হৈছিল যদিও ৰাভিক অসমলৈ আহি মনীষা
আৰু মনীষাৰ পৰিয়ালক লগ পোৱাৰ দৃশ্যসমূহ গুৱাহাটীৰ খাৰঘূলি, উজানবজাৰ পাৰ্ক, মেঘালয়ৰ
বৰাপানী আদিত শ্বুটিং কৰা হৈছিল৷ মনীষাৰ পিতৃৰ চৰিত্ৰত অভিনয় কৰা আবৃত্তিকাৰ অৱনী বৰাই
পৰিচালকে দিয়া চুটি চুটি সংলাপেৰে চিনেমাৰ কাহিনীৰ বিষয়ে বিশেষ একো নজনাকৈ এই দৃশ্যসমূহত
অংশগ্ৰহণ কৰিছিল বুলি কথা প্ৰসঙ্গত এবাৰ মোক কৈছিল৷ চিনেমাখনৰ আন দুটি গীত আছিল—
শেৱালি ফুলৰ
সুবাসে যেতিয়া
শাৰদী সন্ধিয়া উপচি পৰে
শুকান শীতল মলয়াছাটিয়ে
মন কিয় মোৰ উদাস কৰে………(কণ্ঠদান-শান্তা উজীৰ)৷
হেমন্ত গোস্বামীয়ে লিখিছিল– কণ কণ মৌমাখি উৰি ফুৰো জাক জাক/ ৰঙে ৰসে জীৱনৰ গঢ়ো আমি মৌচাক/ মৌচাক মৌচাক/ গুণ গুণ গুণ সুৰে গীত গাওঁ/ আমি গীত গাওঁ গীত গাওঁ/
আইদেউ সন্দিকৈ৷ অসমীয়া চিনেমাপ্ৰেমী আৰু চিনেমাজগতখনৰ কাৰণে এই নামটো কিমান শ্ৰদ্ধাৰ বা আগ্ৰহৰ সেয়া দোহৰাৰ প্ৰয়োজন নাই৷ ২০১০ চনৰ আৰম্ভণিভাগতে মুক্তি পাইছিল অৰূপ মান্নাৰ আইদেউ৷ প্ৰথমখন অসমীয়া চিনেমাৰ অভিনেত্ৰী আইদেউ সন্দিকৈৰ জীৱন আধাৰিত চিনেমাখনৰ কাহিনী আৰু চিত্ৰনাট্যও অৰূপ মান্নাৰ৷ আবেগিক আৰু চিনেমেটিক– দুয়োটা কাৰণৰ বাবেই আইদেউ মোৰ কাৰণে এখন বিশেষভাৱে উল্লেখযোগ্য চিনেমা৷ অৰূপ মান্নাই এটা সাক্ষাৎকাৰত কৈছিল যে এক দীঘলীয়া সময়ধৰি তেখেতে চিনেমাখনৰ বাবে আইদেউ সন্দিকৈৰ সৈতে কথাবতৰা পাতি থাকিছিল৷ কানাডা, লণ্ডন, ছিংগাপুৰ, ব্ৰাজিল, ঢাকা আদিৰ ১৮ টা আন্তঃৰাষ্ট্ৰীয় চলচ্চিত্ৰ মহোৎসৱলৈ যোৱা আইদেউ-য়ে মান্নালৈ আনি দিছিল অনেক সন্মান-সমাদৰ৷ চিনেমাখন ৰাষ্ট্ৰীয় চলচ্চিত্ৰ প্ৰতিযোগিতাৰ ৰজত কমল বঁটাৰেও সন্মানিত৷ পৰিচালকে চিনেমাখনক চিনেমাৰ ভিতৰৰ চিনেমাবুলি কৈ নাম ৰাখিছিল– আইদেউ-বিহাইণ্ড দ্য স্ক্ৰীণ৷ আইদেউৰ দিনৰ চাদৰ-মেখেলা-ব্লাউজৰ পৰা শৰাই, বানবাটিৰ হুবহু ৰূপ বিচৰিব লগা হৈছিল৷ সেই সময়ৰ জাহাজ, গাড়ীলৈকে বিচাৰাটোও আছিল আমোদজনক৷ জয়মতীৰ পৰিচালক জ্যোতিপ্ৰসাদৰ কেমেৰাটোও তৈয়াৰ কৰি ল’ব লগা হৈছিল৷ চিনেমাখনত তথ্যসমূহ সুন্দৰকৈ ৰাখিও পৰিচালকে পূৰামাত্ৰাই পৰিচালকৰ সৃষ্টিশীল স্বাধীনতাক ব্যৱহাৰ কৰিছিল, যিয়ে চিনেমাখনক মনোগ্ৰাহী কৰি তুলিলে৷ আইদেউ মুক্তিৰ সময়লৈ আইদেউ সন্দিকৈ জীৱিত অৱস্থাত নাথাকিল যদিও বাস্তৱৰ আইদেউ সন্দিকৈক চিৰদিনলৈ ধৰি ৰাখিলে অৰূপ মান্নাই৷
২০১০ চনত
মুক্তি যদিও অলপ দেৰিকৈহে চাইছিলো হীৰেন বৰাৰ বসুন্ধৰা- দ্য আৰ্থ৷ এইখনৰ চিত্ৰনাট্য
ৰচনা কৰিছিল হীৰেন বৰা আৰু সাগৰ সংগম চৰকাৰে৷ এয়া আছিল অসমৰ চিনাকি সমস্যা হাতী আৰু
মানুহৰ সংঘাতৰ কথা৷ বসুন্ধৰা- দ্য আৰ্থো ৰাষ্ট্ৰীয় চলচ্চিত্ৰ প্ৰতিযোগিতাৰ ৰজত কমল
বঁটাৰে সন্মানিত হৈছিল৷ অভিনয় কৰিছিল বৰষাৰাণী বিষয়া, বিষ্ণু খাৰঘৰীয়া, ভ্ৰান্তি মেধি,
ভগবৎ প্ৰীতম আদিয়ে৷ সংলাপ লিখিছিল হীৰেন বৰা, সাগৰ সংগম চৰকাৰ আৰু ড° বিৰিঞ্চি কুমাৰ মেধিয়ে৷
সঙ্গীত দিছিল তৰালি শৰ্মাই৷ চিনেমাখনৰ বাবে তৰালি শৰ্মাই গাইছিল—
অবসুন্ধৰা
জীৱন কৰিলা পৰিপূৰ্ণ
সকলো পাহৰি তোমাক বিদাৰি
আদৰি আনিলো দৈন্য
কোমল ছায়াৰে শীতল কৰিলা ...
(ক্ৰমশঃ)
টোকা : যোৱা সংখ্যাৰ 'স্বৰাজোত্তৰ কালৰ অসমীয়া চিনেমা-১৮'-ত দীনবন্ধু চিনেমাখনৰ সংলাপ ড° ভবেন্দ্ৰনাথ শইকীয়াই লিখা বুলি প্ৰকাশ পাইছে। প্ৰকৃততে ড° শইকীয়াই ভ্ৰাম্যমাণ থিয়েটাৰৰ বাবে লিখা একে নামৰ নাটকখনৰ সংলাপসমূহহে চিনেমাখনতো ব্যৱহাৰ কৰা হৈছিল। এই সম্পাদনা ত্ৰুটিৰ বাবে দুখ প্ৰকাশ কৰি সদাশয় পঢ়ুৱৈ সমাজৰ ওচৰত ক্ষমা প্ৰাৰ্থনা কৰিছোঁ।
পঢ়ুৱৈৰ মতামত (০টা মন্তব্য)