নিৰু দত্ত
ফাগুনক বাগি দি যাব নোৱাৰি পথাৰৰ আলিয়েদি
ইমান টনা-টনি ৰেহা নালাগে আলসুৱা ৰিহা
শুকান ওঁঠেদি সৰৱ সুহুৰি পিচলি
মোকেই জোকায় ।
ইমান ৰঙাকৈ ফুলিছে মদাৰৰ ফুল !
ঘোলা আকাশলৈ মেলি দি জুই আঙুলি
পলাশে নাচিছে লৃগাঙৰ পথাৰত
এবাটি বৰষুণৰ পানীৰে নিদাঘৰ দহন
শাঁত পেলাই পৰি ৰোৱা শিমলু ফুল
দেও দি কেনেকৈ পাৰ হওঁ !
খৰমৰ সৰাপাতৰ দলিচা গচকি
ওলাম গৈ নেকি এখন প্ৰাচীন নগৰী !
মাত এটাই টানি নিয়া বাটৰ মূৰত
চিফুং বাজিছে
ৰিঙা মন শিঙা পেঁপাৰ মাতত উচাটন ।
অদূৰত কেলৈ যুদ্ধৰ দামামা !
একোপাহ জুই ফুলে কুকুহা উৰাইছে
উত্তৰ আধুনিক সভ্যতাৰ
বহুতলাৰ চহৰ চকত ফাগুন ৰৈ নাথাকে
আঁতৰালৈ নিষেধাজ্ঞাৰ ফলক
ফাগুনক বাগি দি মাতাল দুঃস্থ সময় ।
ঠিকনা :
সৰুপথাৰ - ৭৮৫৬০১, গোলাঘাট,
ভ্ৰাম্যভাষ : ৭০০২২৪১১৪৫
পঢ়ুৱৈৰ মতামত (০টা মন্তব্য)