৩১ ডিচেম্বৰ

হৰেকৃষ্ণ ডেকা

কাইলৈ ফেঁহুজালি ফালি
উভতি আহিলে
বেলিটো বেলেগ হৈ আহিব নেকি ?
দোকমোকালি বেলিটো ওলালে কওঁ
এটা নতুন দিন ৷
কাইলৈ ক’ম নতুন বছৰ ৷
এটা পুৰণি বেলি
এটা পুৰণি জোন
এখন পুৰণি পৃথিৱী ৷
কিন্তু প্ৰতিটো দিনেই নতুন দিন ৷
প্ৰতিটো বছৰেই নতুন বছৰ ৷
যদিও কেৱল নিৰ্ভৰ ভৰ,
নহ’লে সকলো শূন্য,

ক’ৰবাত এটা ঈশ্বৰ-কণাই
কিবা কৌতুক কৰি আছে ৷ আৰু সেয়েই
পৃথিৱী ঘূৰি আছে,
পুৰণি হৈও নতুন হৈ আছে ৷
---
টোকা: ভৰ- mass
          ঈশ্বৰ-কণা- Higgs-Boson particle, যি অন্য কণাক ভৰ দিয়ে। ভৰ নাথাকিলে পদাৰ্থৰ সৃষ্টি  নহ'লহেতেন।