মিণ্টু বুঢ়াগোহাঁই
পুৰণি হ’ল কথাবোৰ
জেওৰা এখনে কিমান দিন বেঢ়ি ৰাখিব মৰিশালী
এখন ঘৰৰ বুৰঞ্জী মেলি সৰকি আহে ভৱিষ্যত৷
ককাদেউতা মৰিশালিৰ জেওৰাখন ভাগিল
কাচিজোনৰ পোহৰত
এডাল এডালকৈ ছিঙি গ’ল কামিহাড়
অপৰাধ বুলিবলৈ একোৱেই নাছিল
আছিল মাথো এখন অৰণ্য হোৱাৰ দুৰ্বাৰ হেঁপাহ৷
আঁচলতে সকলোবোৰ মৰিশালি হ’ল
বুকুৰ ভিতৰত বাঁহ ল’লে মিছা সভ্যতা
পোহৰৰ বাট বুলি বাৰীৰ ভিতৰতে
কিমান যে টনা আজোৰা
আত্মীয়তাৰ কাপোৰবোৰো সলকি পৰিল৷
ককাদেউতা মৰিশালিৰ জেওৰা ভাগিল
জুমি জুমি চোৱাৰ অলেখ ভাৱৰীয়াই
লৰাঢপৰাত লাগিল,
লুইতৰ দুয়োপাৰে মৰিশালিৰ আলোচনা চলিল,
কথাবোৰ দেখোন আকাশত পলাশৰ জুই ফুল হৈ
বাজনা বাজিল৷
ককাদেউতাৰ মৰিশালিত এখিলা সৰাপাত পৰিল
তামৰঙী সভ্যতাই মামৰ গুচালে
সোণালী সপোন দেখা আশাই দেৱাল গুঠিব
মণি মুকুতাৰে উপচাই পেলাব ৷
যিমানেই ককাদেউতাৰ মৰিশালিৰ জেওৰা ভাগিব
সিমানেই ভোকৰ লালটিৰে কাৰোবাৰ পেট ভৰিব৷
ভাগিবলৈ দিয়া জেওৰা
এদিনটো সিও কেৱল বুৰঞ্জী হব৷
****
মিণ্টু বুঢ়াগোহাঁই
নিতাই পুখুৰী
ডাকঃ নিতাই পুখুৰী
জিলাঃ শিৱসাগৰ, অসম
পিনঃ ৭৮৫৬৭১
ভ্ৰাম্যভাষ : ৮৬৩৮০৮৫৩৬৯
পঢ়ুৱৈৰ মতামত (০টা মন্তব্য)