ৰিপুঞ্জয় বৰুৱা ঋমন
পানীমহীয়া পানীত পানী ওপঙিছে,
পানী চাপৰিত ফুলিছে পানী ।
পানী বতৰৰে ফল ।
পানীক লৈ পানীয়ে পানীয়ে এখন পানীখেল ।
অতিকে পুৰণি এই খেল। ইতিহাসে গৰকা !
পাশা খেলেও নাপায় জোৰ ।
বছৰৰ পাছত বছৰ ।
কবৰৰ ওপৰত কবৰ ।
ডিঙিয়ে ডিঙিয়ে পানী তাবিজ্ !
পৰুৱা মৰে পানীত পিছলি ।
চালৰ ওপৰেদি বৰ সাপ যায় পানী খেলি খেলি !
তেজত ভাত তিয়াই পানীয়ে ভাতৰ পঁইতা খায় ।
ইখনৰ পাছত সিখন গাঁৱত পানী পৈণত ফল ।
পানী হ’ল পোহৰ ।
পোহৰ হ’ল শিল ।
শিল মানে শিৱ ।
শিৱ আকৌ ৰুদ্ৰ !
পোহৰত বাঢ়ে পেটৰ ভোক ।
পোহৰত উজায় মৃত্যু শোক ।
বৰশী বৰ কৌশলী।
মঙ্গলদীপ ধূপৰ লগত সহবাস কৰা
এফলীয়া দিয়াচলাইটোৰ দৰে বৰ চালাক ই।
পানীৰ তলত পানীভেকুলীৰ কান্দোন
জিভাত শিলৰ শিকলি।
মৰিলোঁ হে চৰকাৰ !
গাঁৱলে এইবাৰ চেনীৰাম আহিব
ঘড়ীৰ টিকনি বাঁওহাতেদি ঘুৰিব ।
পানীবেজীৰে চিলাব পানী সৰকা জপনাৰ ফুটা !
কল খাই বাকলি দিয়া বান্দৰৰ মুখত
মঙলু মহাজনৰ এৰেহা কথা ।
হৰ্ডিঙৰ বিকাশেই বিকাশৰ ৰাসায়ন !
পানীবোৰ ৰঙচুৱা বিপ্লৱ হোৱাৰ আগতেই
ৰঙা পানীৰে আওখলা তৰ্জনী আঙুলিৰ চলে দৰদাম।
আপোনাক কোনটো লাগে ?
বিকাশৰ চকুপানী নে বিকাশৰ গছপুলি !
ঠিকনা :
বিৰিণা পথ, গৃহ নং - ৩
জনকপুৰ চাৰিআলি, কাহিলীপাৰা
গুৱাহাটী-১৯
ভ্ৰাম্যভাষ-৬৯০০৫২৪১২০
পঢ়ুৱৈৰ মতামত (০টা মন্তব্য)