ভাব বিতান

ননী বৰদলৈ

বাঁহীৰ মাত এটা ঢপলিয়াই আহিছে

বাঁহীত ৰাতিৰ সুৰ

বাঁহীটোৰ সুৰত উটি আহিছে দুটি জোনাকী৷

             ***

 মেঘৰ আঙুলিৰ ফাঁকেৰে

কেইটোপালমান বৰষুণ সৰি পৰিছিল

পানীপিয়াজনী চিঞৰি চিঞৰি উৰি গ’ল৷

            ***

বৰষুণৰ পাছত গো-বাটটোৰ গৰুৰ খোজত

অগণন জোন

আকাশত মাথোঁন এটা৷

            ***

ৰজনীগন্ধা এজোপা ফুলিলেই

বতাহজাক মতলীয়া হয়

মদাৰজোপাই নীৰৱে উচুপে৷

           ***

দুখ এটাই বুকুখন যেতিয়া দ-কৈ খান্দে

দুখন সাগৰৰ লহৰে

ওপচাই পেলায় কূল, দোকোলটকা বানেৰে৷