ৰাজীৱ বৰা
সন্তুষ্টি এতিয়া বৰষুণৰ পানী?
সুখৰ সংজ্ঞা সলাব পৰাকৈ আমি জ্ঞানী৷
চোৱাঁ, কিমান সহজ প্ৰেম-অপ্ৰেম ভালপোৱা সহবাস৷
ঢাকনি নাই, বান্ধনি নাই, প্ৰকৃতিৰ দান যৌন উন্মাদনা
সহজ পাপ ঘৃণা জিঘাংসা...
ভাল পাবলৈ সহজ বতাৰ্ই ৰখা টান৷ সংসাৰ কৰিবলৈ ভাল৷
ধৰি ৰখা আহুকাল৷ তথাপি সূত্ৰ লৈ সুখী৷
২২ বছৰত ডিগ্ৰী৷ ২৩-অত চাকৰি৷ ২৫-অত বিয়া৷ ৩০-অত ঘৰ৷
তাৰ মাজতে গাড়ী বাৰী বেঙ্ক বেলেঞ্চ আৰু বহু কিবা৷
সন্তান উৎপাদন দুৰ্ঘটনা নহয়৷ দিন-বাৰ চোৱাঁ
কোন তাৰিখে জন্মিছিল সফল মানুহবোৰ
গম-গতি লোৱা৷ মানুহেৰে মিলক বা নিমিলক
শ্ৰুতিমধুৰ অথচ আজৱ নাম এটা দিয়াঁ৷
গঢ়ি লোৱাঁ ৰইনা৷ চপোৱাঁ৷ মাথোঁ চপোৱাঁ৷
সমৃদ্ধি আৰু সম্পদতে বাচি থাকে নাতি-পুতি৷
সিহঁতৰো নাতি-পুতিৰ ভাৰখন লোৱাঁ৷
পাহৰি যোৱা সাত ফুটৰ কফিন, ছফুটৰ চিতা
আৰু আঠ ফুটৰ সমাধি৷
পঢ়ুৱৈৰ মতামত (০টা মন্তব্য)