কাৰক

স্বপ্না দত্ত ভৰালী

নতুন ঘৰখনত ভৰি দিয়াৰ পাছত, এদিন নন্দেক আৰু শাহুৱেকৰ লগত আবেলিৰ ৰ'দকণৰ আমেজ লৈ থাকিয়েই তাই সুধিছিল-

 “কি নো এইজোপা?”

 দেখাত ঘাঁহৰ দৰেই এটি জোপোহা৷

 “এইজোপা কুশবন৷ পূজা-চুজাত লাগে৷”

 “অ’...”

গছজোপা চিনি নাপাইছিল যদিও নামটো তাইৰ চিনাকি৷ দিন যোৱাৰ লগে লগে তাইৰ কাপোৰ মেলা ডাঁৰদালৰ ওচৰত থকা চতিয়না জোপা, সীমাৰ কাষৰ ঔ জোপাত বগাই থকা শগুণীলতাৰ পৰা বাৰীৰ চুকৰ বছজোপালৈকে গোটেইবোৰ চিনাকি হৈ পৰিল৷ 

 কুশবন হেনো ভগৱান বিষ্ণুৰ গাৰ নোমৰ পৰা সৃষ্টি হোৱা৷ তাতে গৰুড়ে স্বৰ্গৰপৰা অমৃতৰ কলহ আনি হেনো কুশবনৰ ওপৰত ৰাখিছিলহি৷ অমৃতৰ পৰশ পোৱাৰ বাবে এই বন অতি পৱিত্ৰ৷ এইবোৰ কথা তাই শাক কাটি থাকোঁতে নাইবা আজৰি সময়ত চাউলৰ পৰা ধান বাছি থাকোঁতে শাহুৱেকে তাইক কোৱা কথা৷ সেয়ে তাই সেইফালে যাবলগীয়া হ’লে বৰ সাৱধানেৰে যায়৷ কেনেবাকৈ তাইৰ মেখেলাৰ বা কুশবনজোপাত লাগি নাযায়টো! 

“বহুতদিন অহা নাই তহঁত৷ এবাৰ আহি যাবিহি৷ তহঁতক চাবলৈ বৰ মন গৈছে৷”

ফোন কৰিলে সদায়েই এইষাৰ কথা কয় মাকে৷ সিহঁত মাকৰ ওচৰলৈ গৈ ঘূৰি অহাৰ এসপ্তাহমানৰ পাচৰেপৰা মাকে এইষাৰ কবলৈ আৰম্ভ কৰি দিয়ে৷ ফোনটো থোৱাৰ পাছত তাই কিছু সময় আনমনা হৈ থাকে৷ কলেজত পঢ়োঁতে তাই হোষ্টেলত আছিলে৷ ঘৰলৈ মনত পৰিলে কেতিয়াবা খোলা দিনটো গুচি আহিছিল৷ “ক্লাছ খতি কৰি কিয় আহিলি” বুলি আফচোচ কৰা যেন দেখুৱালেও দেউতাকে যে তাই তেনেকৈ আহি ওলালেহি পেটে পেটে বেয়া নাপাইছিল তাই বুজিছিল৷ তাৰপাছত, তাই থকা এটা বা দুটা দিন, তাই ভালপোৱা বস্তুৰে আখলঘৰ ভৰাই দেউতাকে তাইক পুনৰ চহৰমুখী বাচখনত তুলি দিছিল৷ পিছে এতিয়াটো তাই হোষ্টেলত নাথাকে! 

 “কি হ’ল? ঘৰলৈ যাবলৈ মন গৈছে নেকি?”

 তাইৰ আনমনা অৱস্থাটো লক্ষ্য কৰিয়েই মানুহটোৱে সুধিলে৷ তাই ঘৰলৈ যাওঁ বুলিলে তেওঁ তাইক লৈ যাব বুলি তাই জানে৷ পিছে...

 “নাই৷ এতিয়া যোৱাৰ কথা ভবা নাই৷ বিহুলৈনো আৰু কেইটা দিন আছে! বিহুতে যাম বুলি ভাবি আছোঁ৷”

নাই বুলিও বিহুলৈ আৰু দুমাহ আছে৷ তাই চাহখোৱা কাপকেইটা ধুবলৈ বুলি গ’ল৷ সৰুটোৰ বাবে খিচিৰি অকণো সিজাবলৈ আছে৷ যোৱামাহত তাৰ ভাত মুখত দিয়া নিয়মটো কৰি উঠিছে মাত্ৰ৷ 

 “বিহুলৈ দিন আছে৷ নহ’লে যোৱা যদি এনিশাৰ বাবে ওলাবা৷ অহা সপ্তাহত মোৰ হেডঅফিচত কাম আছে৷ দেওবাৰে আবেলি গৈ, সোমবাৰে কাম কৰি ঘূৰি আহিম৷ নহ’লে মংগলবাৰে ৰাতিপুৱা আহিলেও সমস্যা নাই৷” 

আগতে কেতিয়াবা সিহঁত তেনেকৈ যায়৷ তাই লগত গ’লে তেওঁ এনিশা বা দুনিশা থাকে৷ নহ’লে তেওঁ লগত আন কাৰোবাক লৈ গ’লে, কাম শেষ কৰি বাহিৰে বাহিৰে ঘৰলৈকে গুচি আহে৷ 

 “আপুনিয়েই পাৰিলে এপাক সোমাই মাহঁতৰ খবৰ লৈ আহিব নহ’লে৷ মই পাছত বিহুতেই এপাক মাৰিম৷”

“চাওঁ বাৰু৷ লগত কোনোবা গ’লে দিগদাৰি দিবলৈ বেয়া লাগে৷ মায়ে খপজপাই থাকে৷”

হয়ো কথাটো৷ দুটা ককায়েক, দুজনী বৌয়েক নিজৰ নিজৰ কৰ্মক্ষেত্ৰলৈ বুলি পুৱাতে ওলাই যায়৷ মাক ঘৰত বনকৰা মানুহজনীৰ সৈতে থাকিব লাগে৷ জোঁৱায়েক গ’লে তেওঁৰ উথপথপ লাগে৷ এতিয়া আগৰদৰে কৰিব মেলিবও নোৱাৰে৷ 

 “হয় বাৰু৷” 

 কৈ তাই আখলঘৰৰ খিৰিকীয়েদি বাহিৰলৈ চাই পঠিয়ালে৷ মৃদু বতাহত কুশবনজোপা হালিছে-জালিছে৷ তাই লগত গ’লে দিগদাৰি নাই৷ মাকক সহায় কৰি দিয়ে৷ অৱশ্যে ককায়েকহঁত, বৌয়েকদুজনী ঘৰত থাকিলে ৰন্ধা-বঢ়াৰ চিন্তা কৰিব নালাগে৷ সকলোয়েই এপদ দুপদ ৰান্ধে৷ পিছে এতিয়া, যেতিয়াই-তেতিয়াই তাইহে ঘৰলৈ যাবলৈ সংকোচ কৰে৷ তাইৰ দুয়োটা ল’ৰা সৰু৷ ডাঙৰটোয়ে উৎপাত কৰি ফুৰে৷ সৰুটোয়ে অচিনাকি মুখ দেখিলেই কান্দে৷ বৌয়েক দুজনীয়ে তাইক যথেষ্ট মৰম কৰে৷ হলেও তাই মনতে ভাবে-কিজানি তেওঁলোকে আমনি পায়! আগতে অবাধ বিচৰণ কৰা ঘৰখনত এতিয়া তাই কিবা এটা হিচাপ কৰি থকা দি থাকে৷ মাকে উলিয়াই নিদিলে, তেওঁৰ গডৰেজৰ পৰা আগৰ দৰে নিসংকোচে কাপোৰ এসাজ উলিয়াই পিন্ধিব নোৱাৰে৷ ঘৰত প্ৰায়েই কোনোবা নহয় কোনোবা আলহী থাকেই৷ “ঘৰলৈ কেতিয়া ঘূৰিবা” বুলি কেতিয়াবা ডাঙৰ বৌয়েকৰ মাকে সোধা প্ৰশ্নত তাই বিব্ৰতবোধ কৰে৷ সুন্দৰকৈ সজাই থোৱা ড্ৰয়িংৰুমটো ল’ৰাদুটাই খেলিমেলি কৰে বুলি নাইবা ঘৰত কৰাৰ দৰে, খেলি থাকোঁতে খালী ভৰিৰে গৈ মামীয়েকহঁতৰ বিছনাত উঠি দিবগৈ বুলি তাই ভয় কৰি থাকে৷ সেয়েহে আগতে মন গ’লেই হোষ্টেলৰ পৰা ঘৰলৈ গুচি অহা তাই এতিয়া ঘৰলৈ যাবলৈ ‘বিহুটো আহক’ বা ‘পূজাৰ বন্ধতহে যাম’ বোলা উত্তৰটো জিভাৰ আগত ৰাখে৷ 

 “হ’ব দিয়া৷ আমি বিহুতেই যাম নহ’লে৷ কাইলৈ নোসোমাও আৰু৷ মালৈ গধূলি ঘুৰি আহিহে ফোন কৰিম৷ নহ’লে মই সোমাম বুলি তেওঁ আশা কৰি থাকিব৷”

 তাই তেওঁলৈ চাই মূৰ দুপিয়াই হাঁহি গাজৰ আৰু আলু কাটিলে৷ এমুঠিমান ধোৱা মগুৰ সৈতে নামমাত্ৰ জহাচাউল ধুই কুকাৰটোত ভৰালে৷ তাৰপাছত পুনৰ কুশবনজোপালৈ চাই পঠিয়ালে৷ 

বনজোপা দেখাতহে লাহী আৰু দুৰ্বল৷

অথচ ই দেখোন ভাবিব নোৱাৰাকৈ শক্তিশালী৷ এই বনজোপাই তাইৰ ৰূপান্তৰৰ কাৰক৷ তাইৰ বিয়াৰ দিনা দেউতাকে এইজোপা চিঙিয়েইটো তাইক বিয়া দিছিল! 

 এক নিমিষতে তাইৰ ৰূপান্তৰ হৈছিল৷

মৰমৰ জীয়াৰীৰ পৰা আলহীলৈ৷

ঠিকনা :

টঙনাপাৰা, ধেমাজি

ফোন: 8473078085

মেইলঃ swapnduttabharali@gmail.com

ফে'চবুকৰ লিংকঃ https://www.facebook.com/swapanadutta.bharali