ৰাম কথা

অজন্ত কুমাৰ বৰা

তুমি ৰাম বোলাঁ নে হৰি বোলাঁ

গড বোলাঁ নে আল্লা বোলাঁ

তুমি চাকি জ্বলোৱাঁ নে মম জ্বলোৱাঁ

যজ্ঞ কৰাঁ নে হজ কৰাঁ

সেয়া তোমাৰ কথা

আমি বাধা নিদিওঁ

প্ৰতিবাদো নকৰোঁ

পিছে  তেজ গ্ৰহণ কৰোঁতে নুসুধিবা

এই তেজ ৰামৰ নে ৰহিমৰ

শিক্ষাদান কৰোঁতে নুসুধিবা

তুমি অমলা নে আমিনা

ভোকাতুৰক এগৰাহ ভাত দিওঁতে নুসুধিবা

তুমি জোছেফ নে এঞ্জেলা

যদি নিৰ্যাতিতা হয়

তোমাৰ ঘৰৰ কাষৰ সীতা

পাৰিলে অকণমান সহায় কৰিবা

পাতাললৈ যাবলৈ বাধ্য নকৰিবা

তুমি ৰাম নে নাথুৰাম

নাজানো

তুমি সুৰক্ষা দিব নোৱাৰিব পাৰাঁ

পিছে জিভা নাকাটিবা

ৰামনামী কাপোৰখন গাত মেৰিয়াই  ল'লেই

তুমি ৰাম নোহোৱাঁ

হজ কৰিলেই তুমি আলিম নোহোৱাঁ

তুমি যিমান ওপৰলৈ উৰিব পাৰাঁ উৰাঁ

সবাৰে ওপৰত মানৱতা

এই কথাটোহে মন কৰিবা

কি প্ৰিয় তোমাৰ

কোৰান  নে গীতা

গো নে গাখীৰ

আমি নোসোধোঁ

তুমিও নুসুধিবা

তুমি মানুহ

তোমাৰ দুটা চকু আছে

দুখন কাণ আছে

আছে এটা বিৱেক

কথাটো ভুলতো নাপাহৰিবা ।।

 ঠিকনা : 

যোৰহাট - ১

ফোন : ৭৬৩৬৮২২৯৮৫